Устоз ижодкор, Ўзбекистон Қаҳрамони, халқ шоири Абдулла Ориповнинг икки жилдли китоби АҚШда нашр этилгани ҳақида хабар берган эдик. Яқинда устознинг «Мен нечун севаман Ўзбекистонни?» биринчи жилд ҳамда «Жаннатга йўл» иккинчи жилд шеърий тўпламидан иборат китоблари Канадада ҳам чоп этилди.
Торонто шаҳридаги «Altaspera Publishing & Literary Agency Inc.» нашриётида чоп этилган бу китоблар ўзбек шеъриятига, жумладан устоз Абдулла Ориповнинг бетакрор ижодига дунёнинг янада кўплаб китобхонлари эътиборини тортиши шубҳасиз.
Президентимиз Шавкат Мирзиёев ташаббуси асосида бу йил устоз ижодкор Абдулла Орипов таваллудининг 80 йиллиги мамлакатимизда кенг нишонланаяпти. Шоир ижодига бағишлаб адабий мулоқотлар, давра суҳбатлари, анжуманлар, шеърият кечалари ғоят самимий руҳда бўлиб ўтмоқда. Айни пайтда миллий адабиётимиз фидойиси бўлган Абдулла Ориповнинг ижод намуналаридан иборат китоблари қайтадан, янада мукаммал тарзда нашр этилмоқда.
Қирғизистонлик истеъдодли шоир Раҳим Карим таржимаси билан чоп этилган ҳар иккала жилд ўзбек, қирғиз, рус ва инглиз тилларида экани диққатга сазовордир. Ҳассос шоиримизнинг бу икки томли китоблари устознинг танланган шеърлари, драматик достонларидан иборат бўлиб, биринчи жилди сўзларининг муаллифи Абдулла Орипов бўлган Ўзбекистон Республикаси Давлат Мадҳияси билан очилади.
Китоб аввалида Президент Шавкат Мирзиёевнинг устоз Абдулла Орипов ҳақидаги илиқ ва самимий сўзлари билан бошланиши Ўзбекистонда китобхонлик, миллий адабиёт, ижод аҳли давлат раҳбарининг доимий эътиборида эканининг яна бир ёрқин намунасидир. Шунингдек, мазкур китобда устоз Абдулла Ориповнинг қизи Шоира Орипованинг дил сўзлари ҳам келтирилгани нашрларнинг ўқувчи учун қизиқарли, ҳаётий бўлишини янада кўпроқ таъминлаган.
Китобнинг биринчи жилдида қирғиз тилига таржима қилинган шеърлар ҳам чоп этилган. Улар орасида атоқли қирғиз адиби Чингиз Айтматовга бағишланган «Қирғиз замини» шеъри ҳам ўрин олган.
Китобнинг иккинчи жилдида устоз шоиримизнинг «Жаннатга йўл», «Самовий тўй» достонлари ҳамда Абу Али ибн Синога бағишланган «Ҳаким ва ажал» достони ўрин олган. Устоз шоир ижодига бағишланган ушбу китоблар олис Канадада ҳам шеърият ихлосмандлари қалбидан жой олажак.
Н.Усмонова,
ЎзА