9-may – Xotira va qadrlash kuni!
Yurtimizda inson qadrini ulug‘lash, keksa avlod vakillariga hurmat va ehtirom ko‘rsatish, Vatan ozodligi hamda xalq tinchligi yo‘lida fidokorona xizmat qilgan insonlar xotirasini yod etish kabi ezgu qadriyatlarni o‘zida mujassam etgan muhim sanalardan biridir.
Bu kun xalqimiz uchun nafaqat tarixiy xotira, balki insoniylik, mehr-oqibat va sadoqat timsoli sifatida ham alohida ahamiyat kasb etadi. Ayniqsa, urush va mashaqqatli sinov yillarini boshdan kechirgan, yurt ravnaqi va bugungi tinch hayot uchun munosib hissa qo‘shgan faxriylarimizga ehtirom ko‘rsatish xalqimizning azaliy qadriyatlaridan biri hisoblanadi.
Xotira va qadrlash kuni orqali biz ajdodlarimizning jasorati, matonati va Vatanga bo‘lgan cheksiz muhabbatini yana bir bor yodga olamiz.
Ikkinchi jahon urushi yillarida minglab yurtdoshlarimiz frontlarda mardonavor jang qilgan bo‘lsa, front ortida qolgan insonlar ham ulkan fidoyilik va sabr bilan mehnat qilgan. Og‘ir va sinovli yillarda xalqimizning bag‘rikengligi, insonparvarligi va hamjihatligi butun dunyoga namuna bo‘ldi.
Bugungi tinch va osuda hayot ana shunday jasur va fidoyi insonlarning mashaqqatli mehnati hamda buyuk jasorati evaziga barpo etilganini unutmasligimiz kerak.
Yurtimizda bugun keksalarni e’zozlash, faxriylarni qo‘llab-quvvatlash, ularning holidan xabar olish va munosib ehtirom ko‘rsatish davlat siyosatining ustuvor yo‘nalishlaridan biriga aylangan.
9-may – bu o‘tganlarni xotirlash, bugunning qadriga yetish va kelajak avlodni ezgu qadriyatlar ruhida tarbiyalash kunidir.
Xotira muqaddas, inson qadri esa hamisha ulug‘dir.